-
اسمع مسلسلك ع الراديو
-
رجاء بلمليح .. وداعا..
-
شباك التذاكر الأمريكاني
|
انتشرت في الفترة اللي فات بعض الأقاويل عن وفاة
رئيسنا المفدى أطال الله بقائه وتناقلت بين الناس
علي شكلين أما إشاعة أو أنها أخبار صحيح وطبعا
بمساعدة الكثير من الأساطير الصنع المصري .. زادت
الإشاعة اكتر واكتر حتى أنها وصلت للادعاء بان
زيارة الريس للقرية الذكية وبرج العرب (اللي كان
قاصد الظهور بهم ونقلهم مباشرة علي التليفزيون
لتكذيب الإشاعة) بأنها تسجيلات قديمة وتم تلفيق
كلمة مباشر عليها.
وكل واحد عنده مليون تبرير لاعتقاداته يعني واحد
يقلك "ياعم دي البلد مليانه كماين شرطة خاصة منطقة
مدينة نصر ودول موجودين عشان يسيطروا علي اي حاجة"
وطبعا لأننا مصريين الكلام أتنقل بدون ما يعدي علي
المخ ولا الدستور اللي كلنا صوتنا عليه واللي في
احد مواده بيقول في حاله وفاة الرئيس أو تخلفه مع
عدم وجود نائب يحكم البلد رئيس مجلس الشعب والجيش
مش الشرطة..
اكتر حاجة شدت انتباهي هو مدى اهتمام شعبنا
بالكلام اللي أتنشر بالشكل دة وأكيد كان هدفه
الأول هو الاطمئنان علي رئيسنا المفدى أطال الله
بقائه وزاد من سلطاته وباب غنوجة علي رأي "عادل
امام" .. لكن كمان بيدل علي حاجتين أولهم اننا شعب
نموت في الزيطه وده مش جديد والتاني هو أننا مش
عاوزين غيره او خايفين من غيره والمصيبة لا يطلع
مش عارفين غيره أو اللي هيبقى غيره لان الكل بقي
متأكد إن وجود غيره مش هيبقي بأيدينا ولا
باختيارنا..
الحمد لله أن الكلام طلع إشاعة وربنا يديم علي
ريسنا الصحة ويستحمل بلاوينا كمان تلاتين ولا
أربعين سنة ومن بعده الورثة مهو احنا قدره ومعلش
يا ريس لو كنا ديقناك بالكلام الفارغ اللي حصل
الكام يوم اللي فاتو أحنا مهما كان شــــعب وولاد
شــــعب مصر.
بعيدا عن دة كله .. كل سنة وانتم طيبين بمناسبة
شهر رمضان الكريم وتهنئة خاصة لريسنا ويارب يعودة
علينا بكل الخير. |
